جربت تعيش بخيمة!
معاناة شديدة يعيشها المواطنون في قطاع غزة وتحديدا النازحون الذين اجبروا على ترك منازلهم واللجوء للعيش في خيم بدائية.
الزميلة الصحفية هنا عليوي - غزة تشاركنا تجربة مكتوبة عن الحياة في الخيمة في هذا المنشور عبر صفحتها على فيسبوك.
جربت تنام بخيمة؟
جربت تفقد كل شي بحياتك!؟
نفسي احكي لاي حد بيقلي نحن حاسين فيكم؛ اقله تعال حس عالمزبوط الاحاسيس التالية:
احساس انك تنام بخيمة
طيب بلاش خيمة، تنام بغرفة وحدة صغيرة برفقة ١٠ اشخاص نصهم أطفال، و هادي الغرفة هي غرفة الغيار و غرفة الاكل و غرفة النوم و غرفة المعيشة و المطبخ واحياناً بنحمم الولاد بنفس الغرفة
فش خصوصية.. انسى الخصوصية
انت حتى ما بتحظى بفرصة انك تتواجد لحالك بالغرفة تغير ملابسك.. اه والله غيّر ملابسك قدام الكل و تعال قلي قديه حاسس فينا
تعال اقف في طابور الحمام خصوصاً الصبح قدامك عشرة عشرين وراك عشرة عشرين
اجا دورك تفوت يلا يلا تلحق تعمل شي واحد فقط
شي واحد
تقضي حاجتك او تغسل وجهك زي العالم و الناس او تنضف اسنانك
وصدقني ممكن تكسب وقت اكتر لو فات معك حد تاني عالحمام و تتبادلو الادوار مهو مفيش خصوصية
اه والله
استنى.. الحمام غالباً ما فيه ماي
دبر حالك جوا
و تعال قلي قديه حاسس فينا
جرب تشتهي اكلة.. مهما كانت بسيطة
بلاش انت.. جرب شعور يطلبو ولادك منك اكلة بسيطة خبزة ولا بيضة ولا تفاحة
و ما تقدر تجيب
ما تقدر تجيب لان معك مصاري الدنيا و بطل الها قيمة
و ما تقدر تجيب لان ما معك مصاري
و ما تقدر تجيب لان اصلا ما في شي تجيبه
جرب احرم حالك او اشتهي شغلة لشهوووور وتعال قلي قديه حاسس فينا
جرب تنام بنفس اللبس وتصحى بنفس اللبس و تطلع بنفس اللبس وتاكل بنفس اللبس و تعمل كل شي بنفس اللبس
لييييه؟ لان فعلياً انت محظوظ ازا معك غيارين! ومحظوظ اكتر لو قدرت تشتري وازا اشتريت رح تشتري لبس ولادي لبنتك و لبس رجالي لمرتك المهم تدبر حالك و تستر حالك..
جرب تموت من البرد لان ما معك لبس شتوي و مش لاقي لبس شتوي وتعال قلي قديه حاسس فينا
جربت تكون مرتك حامل في شهرها بالحرب!!
جربت شعورك او شعورها كيف هتروح تولد في نص الليل ولا تحت القصف
جربت تطلع مع مرتك الحامل!! جربتي تكوني حامل بالحرب
كيف شعورك و احساسك!!
عارف انه انقطع حليب الامهات من صدورهن بسبب الخوف و قلة الاكل!!
طب جربت شعور ابنك ينولد في حمام او في سيارة او في الشارع او في خيمة؟ تخيل لو كان ابنك البكر
جربت شعور ما تلاقي لبسة وحدة لابنك المولود؟؟
جربت شعور ما تلاقيله بامبرز؟
جرب شعور انه ابنك ينلف بوجه فرشة ولا اسدال صلاة لان مو لاقيله كفولة ولا حرام وبعدين تعال قلي قديه حاسس فينا
جربت تحتاج دوا و ما تلاقيه !!
جربت تكون عندك مرض مزمن
امك عندها مرض مزمن
ابوك عنده مرض مزمن
و مش لاقي دوا
و عايش عالبدائل
و صحتك بالنازل!!!
جرب عيش هاد القلق و تعال قلي قديه حسيت فينا
قال والله نحن حاسين فيكم!! شو حاسين بالضبط!!
وك جرب ما تطلع مطاعم
جرب ما تصحى تشرب قهوتك
جرب ما تروح شغلك وتمارس حياتك كإنسان
جرب تفقد مصدر رزقك
جرب ما تاكل غير معلبات لاسبوع مش لشهور
جرب ما تمشط شعرك كل يوم ولا تتحمم و لا تتعطر
جرب شعور ما تعرف شي عن اهلك و عيلتك وحبايبك بالايام و الاسابيع و الشهور
جرب تفقد حبايب قلبك عيلتك ناسك و اهلك
جرب تنحرم من شغلك وكيانك
جرب تنسى انه انت كان عندك شغل و كيان
جرب تنسى انه عندك سيارة و انك ابن عز
جرب تنسى انه عندك حياة
جرب تنحرم من انسانيتك
جرب تنحرم من مستقبلك
جرب تنحرم من حقك
جرب تنظلم
جرب تنذل .. اه تنذل
جرب يعايرك حد
جرب شعور تنام عصوت الزنانة
جرب شعور تصحى على ابنك بنص الليل بيرجف و هو نايم من الخوف و البرد
جرب تنحرم ترتاح ساعة وحدة لحالك
اه والله
و تعال قلي قديه حاسس فينا
بقلم هنا عليوة
