راصد جوي يوضح بشأن الموسم المطري وفرص المنخفضات

أصدر الراصد الجوي ليث العلامي، توضيحا مهما حول المخاوف والتشاؤم بخصوص الموسم المطري الحالي، وذلك بعد أن مضى النصف الأول من شهر كانون الأول/ ديسمبر بدون منخفضات جوية حقيقية واضحة.

وأكد العلامي، ان الشهر الحالي لم بنتهِ بعد وبصيص الأمل موجود بالثلث الأخير مع بداية المربعانية والشتاء فلكياً، والشتاء قادر على أن يرجع ويفرض ذاته ويعوض النقص الحالي الحاصل بمشيئة الله.

وفيما يلي التوضيح الصادر عن الراصد الجوي:

خلال الأيام الماضية كثير ناس بلشت تتخوف وتنظر بتشائم للموسم المطري الحالي، خاصة انه مضى النص الأول من شهر (كانون أول/ديسمبر) بدون منخفضات جوية حقيقية واضحة ، لدرجة انه في ناس قضوا على الشتاء قبل ما يبلش - فلكياً ما زلنا بالخريف-.

عادةً الناس ذاكرتها الطقسية قصيرة وبظل ذهنها متعلق ببعض المواسم القوية وبننسى مواسم/فترات الاستقرار يلي كانت تصير بسنوات  أخرى ، وعطول بنرفع شعارات (بطل في بركة زي زمان ، الشتا تغير عن سنين زمان ، من يوم ما صار في راصدين بطلنا نشوف المطر ، وغيرها ..) وهاي الأحكام ما بتحمل اي حقائق علمية !

والحقائق هي أنه :

1. موقع فلسطين الجغرافي/المناخي على طرف حوض البحر المتوسط محاطة بالصحاري ، من الجنوب الشرقي صحراء شبه الجزيرة العربية ومن الجنوب الغربي صحراء سيناء ، غير أنه حتى جزء من فلسطين عبارة عن صحراء بالفعل مثل صحراء النقب.

وبالتالي من الطبيعي حسب موقع فلسطين الجغرافي/الفلكي ، يصير في تفاوت في كميات الأمطار بشكل كبير من شهر لآخر ومن سنة إلى أخرى لأنها مش بموقع رطب تماماً أو بموقع قريب لمصادر الكتل الباردة.

2 : إرشيف فلسطين المناخي المُمتد عبر مئات السنوات الماضية كان يتنوع من مواسم ماطرة بشكل ممتاز ، لماطرة بشكل اعتيادي ، لبعض السنوات يلي كان يصير فيها حالات جفاف وقحط حقيقي لكامل الموسم مش عمستوى فترة مؤقتة أو شهر من الموسم بس .

3 : لا يمكن الحكم علمياً على انه اي بداية اي موسم بأقل من المعدل او المعتاد مطرياً انه رح ينتهي الموسم بنفس السلوك ، كثير مواسم بلشت سيئة وتحسنت لاحقاً ، وطبعاً في برضوا موسم بلشت وانتهت بشكل سلبي (بس مش دايماً).

4 :  عدد من الأمثلة على بعض السنوات يلي صار خلالها ندرة بالأمطار بشهر ديسمبر بالسنين الماضية منها :

.2020 .2017 و 2015 و 2014 و 2011 و 2008 و 2007 و 2006 و 2005 و 2004 و 2000 و 1999.

وبعض من هاي السنوات تحسن فيها اداء الموسم المطري بشكل كبير باشهر الشتاء الفعلية ( 1 و 2 و3 ).

5 : شهر (11/نوفمبر الماضي) كانت الأمطار بعدة محافظات فلسطينية كثيرة حول لأعلى من معدلاتها على مستوى الشهر نفسه .

طبعاً ما في شك أن شهر ديسمبر بلعب دور مهم في توزيع الموسم المطري بشكل متوازن وهاي نقطة بتهم المزراعين .

ومع هيك ، الشهر الحالي ما انتهى وبصيص الأمل موجود بالثلث الأخير مع بداية المربعانية والشتاء فلكياً  ، و الشتاء قادر على انه يرجع ويفرض ذاته ويعوض النقص الحالي الحاصل بمشيئة الله .

تفائلوا بالخير تجدوه.